منتدى حلا البنات - منتديات بنات

الأوسمة · 12-11-2011, 07:05 AM

بسم الله الرحمن الرحيم

الموضوع اللي بأطرحه أكيد سبق وأنطرح والكل تكلم فيه

يقول المطرب مدري وش اسمه

دلوعتي كل الحلا فيها احترت أنا مدري شسميها
في حسنها كن البدر ضاوي اخت القمر محدن يساويها

بعد قال الثاني : دلع عيني دلع دلع روحي دلع

وفي الشعر قالوا :
أنت الدلع والا الدلع هو تبناك..ألخ القصيده <-- !!

الموضوع واضح من السطرين اللي فوق وهو عن الدلع بين الحقيقه والمدري وشو ( خشه قازه موضوع مطاول ) لا جد نبي نتكلم ونناقش سالفة الدلع اللي مدري وش سنعه هالأيام والمشكله انه دلع مصطنع ويجيب القرف ويخلي الواحد يشعر بالتقيوء <-- اسمها تتكلم عن الهاي كلاس واللو كلاس ما يصير نقول تطريش

والله يا بنات احس الموضوع مصخ قمنا نشوف مناظر ونسمع كلمات وأصوات تجيب الحرقان بالقولون والمعده والجهاز الهضمي كله مدري كيف ساكتين عنها صراحه ,, يعني بنات اللهجه عندهم انضربت بشكل فضيع وأصواتهم ومخارج الحروف تقلبت والأمور عادي وكنه جايزن للناس حسبي الله على من تسبب بلوي ألسنة بناتنا ..

يعني الحين يوم نسولف مع بنيه تقولين لها شلونتس ترد عليتس زيناااااا ليه أحد قايل انتس نحول !!! وين طيبه وبخير والحمدلله ؟ والا تقول كويسه خير جالسه مع نفرات هنود يوم تقولين كويسه ؟ مير لو قايله منيحه ارحم أجل كويساااا وتيباااا وزيناااا ولازم المده في الأخير ؟! وش السر والحكمه مدري صراحه وعلى طاري كويسااا وزينااا تعالوا فيه كم مثال للكلمات والحروف الدارجه هالايام عند فئة البنات والله شي عجيب ( ملاحظه تم الإستعانه ببنت مراهقه بالثانويه + العم قوقل ) المدرسه صارت سكول ويا انتس قرويه ياللي للحين تقولين مدرسه وشكلتس بنت مدرسة حكوماااا حتى المدارس الحكومه والخاص صار فيها تفاخر أبفهم مهب سكول هي المدرسه بس بالإنجليزي ليه عاد ما نحتسي عربي يا سليلات الملكه فكتوريا

هذا غير البينك والاوف وايت وياقدمهااااا اللي تقول زهري وسُكري ذي يقولون من اي قبر طالعه ؟! بالإضافه للتشوكليت والميلك والدريسس والبرا والبريود وبعد كلمة شنو ومشان الله وكبر يا بنات السعوديه استغنيتو عن وشو ووشهو وعلشان وصرتو تقولون شنو ومشان وفيه كلمه تنرفزني جداً جداً كلمة آينووو وكيذااا مثل لو وحده تسولف وقالت آينوو هياا قالت لي كييييذااا ( خشه تظهر اللي بتسبدها) يعني هالكلمتين انا ما اتقبلها الا من الحجازيات لأن هذا هرجهم الطبيعي بدون تصنع بس تجيتس وحده مابي احدد ديره او قريه علشان محد يزعل وتقول هالحتسي قسم بالله انه يطلع من فمها يحوم التسبد والله كلمة آنووو ذي لحالها تسبب لي تهيج بالقولون مدري وراه وقسم بالله كرهت وحده من البنات بسبتها ..

بعد فيه الحروف اللي تقلبت عندنا مثل الصاد صار سين والراء باقي نتفه وتصير واء ياي يالشعب الفرنسي مدري وراه بناتنا يرققون الراء لين يغدون لثغان ؟! اول مره صراحه اشوف احد يفرح بالعيوب الخلقيه ويتمناها !! ليت ربي يبلاهم ويصيرون ثرمان بالمره هماه كله دلع وكمانآ الطاء صارت تاء ماش الحروف ذيلا معدهيب معترف بها ابد سراحاااا ايه وفيه حرف ياحبة عيني من اول مظلوم والناس مهب ينطقونه الا بشق الأنفس الحين انسحب عليه مدري محسوب للأن من حروف الهجاء او لا اللي هو حرف الضاد من اول ينطقونه ظ الحين مع الدلع صار دال يالله دخلك مريضه صارت مريدااا الله يكفينا شر كل شيطان مريد

وغير ذلك من أنواع الدلع بالحتسي والكلام اللي لو جلست لين باتسر ما قضيت علشان كذا ابي انتقل للشق الثاني من خطوات الدلع الحيلو وفيه ملاحظه ذكرتها مير قبل ما انسى
ليه كل وحده تبي تصير دلوعه تكتب الألف بمده تسذا --> آآآ وتكررها ؟!

ترا الدلع مو تصنع يامال العافيه الدلع يجي طبيعي والي تبي تتصنع تتصنع شوي شوي مو تعوج الحروف وتسبل بعيونها ويعنني اتدلع
ولا يهون الفيس الدلوع الي تحطه بعد كل كلمه يعنني ترا مستحيه ودلوعه وكيوت ، ودي اجيبه بس ماهو فيه بصندوق الرد ههههههه
ولا الكلمات ( تفششآآآآآنه ، تيب ، عنتي ، متري,خلاس ,تلعنا,اينووو )
بس ماني قادره اكمل

لابغيتوني اترجم لكم لا يردكم شي

قسم بالله كلمه خلاس اللي يقولها لي يجيني قرف مو طبيعي

نجي للشي الثاني وهو الدلع بالشكل

ليه صارت أشكال بناتنا كذا رقبه مايله على جنب تقل احدن فارن وجهها بكف والشعر مغطي نص الوجه والمشيه الله بالخير غير التخريم بالبرطم والآذان والخشم والبطن ماباقي مكان ما حطوا فيه زمام مدري صراحه وش علاقة الدلع والكيوت والنعومه بهالأشياء اللي فوق كلها ولازم كل دلوعه تكون رقيقااا وصوتها تقل تسولف بأبريق لا مخارج حروف واضحه ولا صوتن واضح وتتكسر وهي تحتسي على اساس البنات عندنا مندوبات لحليمااااا المشكله تعالوا شوفوهم ببيوتهم شلون يحتسون مع بعض تقل عزبة صعايده من الاصوات اللي تروع والدفاشه والخلقنه والوجيه اللي تقطع الرزق

للأسف الدلع عندنا صار إصطناعي وما عاد نشوف وحده دلوعه بالفطره إلا ما ندر وإن كانت خلقتها دلوعها نلاقيها عاد طاقه حوله وماشيه عكس السير ومعربجه وصايره بويه !!

متى بعض هالبنات يعرفن انهن صارن مكشوفات وإن دلعهن يمرض ويجيب الطاعون ومتى يعرفن أن هالشي ماله علاقه بالأنوثه والنعومه و هالعاده الكريهه متى تنتهي؟! لا أحد يقول يكبرن ويعقلن لأن الحمدلله والشكر ألحين صرنا نشوف بعض الكبار الامهات خافه عقولهن يارب ثبت عقولنا علينا وصايرات مايقات مايعات ما ينهضمن

كثير بيشوفوني أنا وموضوعي مالي داعي وأني طعسه منقهره لأن مافيني ذرة دلع ورقه وأنوثه ونعومه

وهذي مواقف بعض البنات مه هالفئه المريضه واللي حالتها مستعصيه

1-
قبل فترة بـ رمضان جيت للـ بنات بـ القروب طايرتن بوهتي وبـ نفس الوقت أدور أقرب مغسلة أبي أستفرغ
جالستن أقرا موضوع وجلست ساعه متنحة عند كلمة ( التبك )
وأرجع أبدأ الجملة من جديد وماااش عجزت أفهم أخر ماهنا صارت تقول مصلحتن طبق !!
الطبق صار تبك
ياااااااااتسبديه بس ياصبر الأرض عليهن

2-

اخبر وحده من طقة الياي والكيذا وايينووو دقيت عليها على اساس اينوو نتكلم عن المشروع
قالت دقيقاآآ مرآآ ازعاج هيناآآ قلت طيب ونست تحط تعليق شكلها
مير شكل اخوها رافع ضغطها وتقوله بصوت اجش انقلع اطلع من الغرفه ولا والله لا اقول
لامي ياحقير ياكلب اينو مررآآ حقير ايينو مرآآ ازعاج يااي وينها هذي هههههههههههههههههههه
لا لا مهيب الي اعرفها يوم رجعت وشكلها معصبه ايه وش تقولين راح نسوي بالمشروع
اخترتي انتي والبنات الموضوع ولالا ووش المطلوب مني <- هذي انسانه غير ميهب الي اعرفها
لو انها هي كان مفروض تقول ايوواا شو السبجقت تبع البروجيكت وشو الشغلاآآ الي انا وواح اعلمها
وانتوو اآآيش اتفقتو تعملووو انتي والقيرلز .. ياقلب لا تحزن ..

3-

المهم انه شي يوجع التسسسبد صدز اذكر اني بـ احدى المنتديات شكيت هو سعودي ولا جزآئري ساعه ابفهم وش الكلمه عجزت واخر شي اكتشفت انه دلع كآنت كاتبه انآآآآآآآآآآآآآآآآآه >> لدرجة جبت دفتر كشكول وقلمي وجلست اعربه واحطه بجمله يمكن يطلع معناه لي مآدريت ان البنت فرحآنه وكآتبه اللــــــــــــــــــــــــه -> استغفر الله

4-

بحكي لكم موقف للبنت اختي بالجامعه تقول عندهم وحده من صديقاتهم ايام الثنوي تقول عقب مادخلنا الجامعه والبنت ينقلب كلامها ميه وثمانين درجه من شلة تيب صارت

تقول مره في الكفتريا وكان عندهم بريك او استراحه وكانت مليانه يتناقشن بمشروع وتقول دبلت تسبودنا بكلمة تيب وتيب
وعندهم وحده معربجه وتقوم تقول انا بربيها لكم وتصوت عليها من بعيد وتقول فلانه انا ابي افهم انتي في المدرسه مامر عليتس حرف الطاء مدري ماتقولين الا تيب وراتس ماتقولين طيب ولا عندتس حساسيه منه
هههههههههههههههههههههههههه
ويطيح وجها وتقول عقب حرمت وانعدل للسانها

الموضوع هذا مطروح للنقاش والأراء والتجارب يعني اللي قد طرى عليها تتدلع بيوم ما ياليت تكب عشاها وتقول لنا النتيجه اللي صارت معها محناب منتفينها بقوه بس على خفيف

وانا لاشفتكم تفاعلتو مع الموضوع بكب العشاء جعله ماينعاد >>تتذكر

>auhvkhh<<og; 'fdud ^_^

الأوسمة · 12-11-2011, 03:46 PM

لبى قلبك وربي موضوع يجنن
شوفي من ناحيت الدلع الي هو التميلح بختصار الي طايحين فيه البنات
مدري وش يبون طيب يا حلوات انتي مافيك دلع يابنت الحلال
ليش تصنعين خليك مثلي سم الله علي
مافيني دلع وما تصنعت الدلع والخير
جايني
والي كاتبه ربي بيصير لك ماهو جايبه الدلع يا حلوه خليك على الطبيعه احلى
وعلى قولت هيفاء وهبي على الطبيعه كل شئ احلى
خذو الحكمه من افواه الحكماء هههههههههههههههههههه
يسلمووووو موضوع جميل يعطيك الاف الاف عافيه

12-11-2011, 04:57 PM

مشكـورة يعطـيك العافيــة

12-11-2011, 05:26 PM

انا بقول وجهت نظري البنت لازم يكون فيها نعومه بس مو لدرجه زي ما قلتي تصير سايحه

مااحب الي كذا ناعمه يعني بتعامل بس يكون فيه ذوق بس
والباقي لاعادتي ههههههههههه قصدي عادي
ودي بس اخذكم يا الدلووعات جوله عندنا بابها تعلمو تحكو عربي ع اصوووووله اكيد اللحين الي تقرا ابها تقول وووووع ابها لالا بدو

بس تعالو وشوفو البدو كيف يربونكم ههههههههه

ناويلك علئ نيه ........الخ ههههههههههههههههه

ومشكوووووووووووره اختي دفرنت

والله موضووووووع قمه الروعه

تقبلي مروري