عمتم مساءاً ايها الشيون والشينات
الحقيقة اني بحياتي عندي 5مشاكل يبيلها حل..متذكرة منهن 4 وبقول لكم على 8 منهن وهي:
ليش امي تكرهني ودايم تحاول تسويلي محاولات اغتيال..؟؟
بس ودي اعرف وودي احد يقولي وشوله تكرهني..؟؟
وراها ما تحبني..؟
آآآآه بس وش اقولكم ..مالت على قرادة حظي
وعلى قول الشاعر:
كم بقسن جا مع العين ...... وكم عجره جت على راسي
وكم رفسة جت بالكرشه .... ورَّم مــنها بـنكــريــاسي
وكم طحله جت على التسبد ..... دخلتني المستشفاسي
بدت معاناتي مع اميميتي وقصتي الحزينة وياها من يومني ببطنها..هي حملت فيني ثلاث سنين الا ست وعشرين يوم..
في البداية هي مشتلي السالفة بس يوم شافت اني تعديت السنة الثانية قفلت معاها الاخلاق وقالت لازم تشوف لها حل..
بدأ الشيطان النجس يوسوس لامي ويقول وراتس ما تسقطينها هالزلابة..والله بيعوضتس عن بنية غيرها..وهي تعيي
يجيها يمين ومراير يسار..وكان دايم يجي بوقت امي تكون فيه جيعانة ومعصبة..تعرفون لا قامت المعدة تزغرط يقوم الكابل حق
الزاد يضرب العصب ويسوي تماس كهربا ويبدأ الواحد مننا يهلوس ووده لو يذبح له بني آدم..
آخر شي وسوس لها ووجهك ما يشوف النور..لاني مرة كنت افرفر قريب من القلب..وما دريت الا بهاك الهيزوع اللي
ضرب ببطنها وهزني هز..هذا وانا بعيدة.بس اشوى ما كنت موجودة..ولا تسان اتسقطت وبعدين وين اودي وجيهي منكم اذا
ما كان في وضحى مزيونة تهريكم تسذب..؟؟<< اقول لا يكثر وبس
ومع مرور الزمن ركبت دش ببطن امي.. علشان ابغى اتابع سبيستون كانوا يعرضون مباراة ضد الكابتن ماجد..
ويوم جا الشوط الثاني وتبدأ الدعايات اللي تحوم المريرة وتجي دعاية انت مو انت وانت جيعان..سنكرس لا توقف..وعلشاني ما اداني هالدعايات
البثرة..كتمت الصوت..الا واسمع لكم امي تهدد بابوي انه يهدها..لانها ماسكتن سكينة وبتذبحني..هو يقول لها استهدي بالله يا بنت الحلال..وهي
قافلة معها ..وتبي تذبحني..وتقول يا اما ان هالتسلبة تطلع لانها مصختها لا والله اقطعها ارباً ارباً..
انا يوم سمعت هالكلام..عرفت اني امر بلحظات عصيبة تحت تهديد السلاح..يعني ما بقى قدامي الا اتوكل على الله..واطلع بسرعة..بس كيف كيف..
قلت مالي الا ابدأ ارفسها ببطنها..وبعد كم شوتة وكم رفسه ..راحت امي المستشفى وفتحوا بطنها..وطلعت اختكم الشهباء للحياه.
الدكتورة اللي سوت لامي العملية انهبلت..لانها شافتني طالعة ومتلثمة..وحاطة رجل على رجل..المهم طلعوني وحطوني بغرفة جنب الوالدة..
وبلفته من اللفتات ومن كثر ما صرعوني الممرضات من كثر الروحة والجية وانا ما غير اناظرهم لمحت جهاز زي التلفزيون..وتذكرت انه وقت عرض عدنان ولينا..
ناديت السستر وقلت لها يالله حطي لنا على سبيس تون..علشاني ما اعرف وش رقمها عندكم..الا وتقولي هذا جهاز تخطيط قلب ماهوب تلفزيون
قلت لها..ويش يعني..عادي دبرينا لا يفوتنا عفسي..المهم بديت معها هواش هالسستر النذلة..ماهيب راضية تسمع الكلام..
الا وامي اللي ما تتسماش تدخل..انا تجمدت مكاني..وبلعت ريقي..وساد الصمت
وبدينا نقز بعض بعيوننا قز..انا اقز وهي تقز..تمشي هي على جنب..وانا على جنب..والمشهد يمر بحركة بطيئة وظهرت انا بعيون تقدح شرر من تحت اللثمة..
وهي تتوعد لي وتمسح يدها بذقنها بمعني صبرتس علي يالجيفة..
من بعد هالمقطع وانا عرفت ان الاوضاع متدهورة ووصلت للحضيض وياها..واننا وصلنا بعلاقتنا لنهاية مقفلة..
رجعنا لبيتنا في حي المنفوحة وهو حي ما يختلف كثير عن منهاتن..الا ان منهاتن فيها ناطحات سحاب والحي حقنا متروس شجر سدر واثول..
مرت الايام وامي مزبلتني ولا تعطيني وجه..وانا صدري ضاق وما عدت استحمل اكثر..وصارت تناديني وتقول عني " يا ظهر السلحفاة"
ودايم تهاوشني وتدعي علي وتقول عساتس للبلشة يا مالتس الماحي والتبن<<انواع الجفاف العاطفي تجاهي
بعد فترة طلعت اشاعة..لا ماهيب اشاعة الا كارثة..يقولون انها حامل..انا شفت ان بطنها كبر وانتفخ..بس ما توقعت انها تبي تتخلى عني بشكل سريع..
بعد فترة اكتملت مصيبتي..وجابوا بنية غيري اسمها..ديانـا..حلوة ومزيونة..اجل يسمونها ديانــا..؟؟ ويسموني وضحى..؟؟ يا فشلتيي
والكل طاير فهالديانا يبي يفرحها باي شي..ملابس..العاب دباديب..
وانا اللي لي سنين ما غيرولي هالجلابية البيج..اللي اصلها من سوق قرقيز ويشترولي بس من حجاب وحراج..والخمس قطع بعشرة..
صورة للتسلبة والحلوة ديـانـا
طبعا ما يحتاج اقولكم ان كرتي طاح..فوق ما هو طايح من قبل..وصرت زلابة الزلابات..وعيوني تتحسر يومني اشوفهم يشترون لها من السوبر ماركت
الحليبات والنيدو ومكملات الغذاء والفيتامينات وانا يا اشرب ماء او سنتوب وآكل قشر بردقان وبطاطس وبس..ويوم صار عمري ثلثطعشر سنة..كنت دايم اشتهي التويكس
وما حد يجيبلي..وديانا ما غير تزط فالتويكس والمارس زط..وربي انها ظاالمة هالخايسة تبي تقهرني وهي ترقص بحواجبها وتلحس تويكس مغطس بشاهي..
اميمتي انسانة عصبية لدرجة ان اي شي جنبها ياصل..زمزمية..زبيرية..زنوبة..فنجال..حتى ان المخرج الامريكي ميل غيبسون بشحمه ولحمه جا لعندها لجل يطلب
منها تكون البطلة في فيلم له عن القنص..من كثر ما كانت قناصة زبيريات محترفة..مير انها رفضت هالشي..وطردت ميل غيبسون
ميل غيبسون بعد ان تم طرده من قبل اميمتي..
كما عليها اختيارات لمواقع تقبيص بانحاء الجسم تعلّم عليك بعاهة مستديمة مدى الحياة وخصوصا المعقل واحيان تاصل السالفة للتعذيب عن طريق الملح والفكس
بس صرت بالمدرسة كانوا دايم يحبطوني وكلمتهم الشهيرة لي..ادرسي وخلتس مثل بنت عمتس ما ينفعتس من بعد الله غير شهادتس يالفاشلة
طيب وش اسوي اذا هالدماغ عندي تقل كرتون..؟؟ ايش بيدي اسوي يعني..؟؟ وبعدين اذا كنا كلنا مراتب اولى المراتب الاخيرة بتكون لمين..؟؟
مرة كانت امي تبي تطمرني..راكبة فوق الدولاب وتنتظرني امر..وهي تلفعني بذيك الخبطة زي حركات المصارعة اذا جاو ينقزون من زاوية الحلبه
وقتها بس حسيت بدوخة شديدة من قوة الضربة وحتى شفت صيصان وعصافير تدور حول راسي..وطلعتلي جملة " غايم اوفر" بلون احمروما شفت بعدها غير الظلام الدامس
فتحت عيوني بعد فترة الا والقى نفسي بمكان ما ادري وشو..بس فيه ريحة تفقع الراس..ناظرت يمين الا واشوف خروف منبطح جنبي على تخت وفي بفمه اوكسجين
ناظرت يسار شفت تسلب(الله يكرمكم) رجله مجبسة وجالس يقرأ بجريدة ويشوف اخبار الدنيــا
قلت له : وش تسوي هنـا..؟؟
ناظرني بنص عين وقال : انتي اللي وش تسوين هنـا..؟؟
قلت : مادري..طيب وش بلاها رجلك مجبسة عسى ما شر..؟؟
قال : الشر ما يجيك هذا الله يسلمتس كنت بمطاردة مع جزار سرقت من عنده ورك دجاجة لاني كنت مرره جيعان الا وتدعمني سيارة والحال مثل ما انتي شايفة
قلت : طيب مين انــا ؟؟ ووين حنـا..؟؟
قال : عز الله انتس فقدتي ذاكرتس..وش دراني من انتي..؟؟ اما حنا الحين موجودين بمستشفى البيطرة للحيوانات..باين انتس من سلالة الغوريلا..؟؟
قلت : غوريلا فعينك صدق انك تسلب..صدق ما تستحي..واقوم من طولي..والف شرشف السرير على راسي واتلطم واطلع..وانا اعثر واطيح
استغفرت ربي على هالحال..حتى مستشفى زي الخلق اهلي ما ودوني عليها..جلست ابكي من القهر..الا واصادف واحد مزيون لابس بالطو ابيض
قلت وانا مستحية : احم عفواً..تعرف مين انـا..؟؟
قال: افا بس وهل يخفى القمر..انتي اكوس وحدة في العالم..الوضحى..
حسيت قلبي بدا يرقع..وصرت العب بصبع رجلي واخطط بالارض..ولما جاب طاري اكوس وحدة في العالم تذكرت من انـا..
المهم ظليت مرابطة هالمزيون هذا..وكل شوي امر جنب مكتبه..مرة ابي آكل ومرة آبي ادش حمام (الله يعزكم)..يلين صرخ فيني
خلااااااص مصختيها انتي..مو كافي مستحملتس فوق ما انتي آدمية منتي بحيوان..انبثري واركدي يا مالتس الصلاح..صدق انتس نشبة..
المهم لما شفت انه عصب..مسكت قلبي يقالي معي جلطة..واغمض عيوني واطيح نفسي..
صحيت مرة ثانية الا والاقي روحي بمكان ريحته فانيلا..وفتحت عيوني كويس الا وتطلع مستشفى..اي اي مستشفى من حق وحقيق
وناظرت يميني الا وامي تبتسي..وابوي مهموم يقرأ قرآن على راسي..عيوني تجمعت فيها الدموع وبديت ابتسي على حال قلبي المتقطع
يومها ردوني البيت معززة ومكرمة بعد ما انصفقت على خشتي يلين قلت بس..وبعد ايام القهر والعذاب..تيسرت الامور..دخلوني غرفة كلها العاب
وفيها دبدوب وعروسة فلة وانصدمت انها حجرتي انـا لاني كنت عايشة بالزريبة ومراير انحاش للمقلط واندس بوه..
بعد ما امي خمتني وقالتلي من اليوم هذي غرفتس..وكل شوي تجيب ملابس وهدوم وتقيسهم علي
وانا مستانسة وابتسمت لي الدنيا وهي ما غير تحبني وتبوسني وتمسح لي راسي وتتأسف لي لانها ظلمتني..مير قلت لها انا فدوى لتس يا اميمتي
وجلست اغني لها اغنية ريمي" امي..امي..امي..انت الحنان انت الامان ..من تحت قدميك لنا الجنان.." وطقيناها سواليف وكراث..
آخر شي عطتني كرتونة مغلفة بورق هدايا وملفوفة بشطرطون..قلت لها وانا مفهية وش فيها..؟؟
قالت وهي تطلع من الغرفة : افتحيها وبتشوفين..
فتحت الهديـة ولقيت فيها...
" كرتونة تويكس"
هوامش وايضاحات:
الهيزوع :تلك العاصفه الصغيرة او الدوامه التي تكثر في المناطق الصحراويه والبريه
الاثول:جمع اثلة وهو نوع شجر لو ما تسقيه 60 سنة تبقى صامدة..تستعمل للطش الاراضي
تقبيص:هو ضم اصبع السبابة مع الابهام وفركه بالجلد بحركة دائرية عنيفة وقد تكون مميتة وقاتلة احيانا
معقل:المنطقه الفاصله بين القدم والساق
غايم اوفر:معناها شتيمة بالعنقريزي والله اعلم مابي احط شي فذمتي<وجه ماسك دلعة ثوبه ويتفل بها..
خلاص تمت كافي دموع
تحياتي
gk huda td lgtu hld >>[] p.ddddki
.gif){kind=icon}
العرض العادي
